Exo 24 | TVK | STEP |

Exodus 24

Hi Pol ni Hitxatien te Xeih Del Moletin Nan Xil e Xil Labit Lilong Xati

Eksodas 24:3-8, 12-18

3 Melele xa Iahova misepin mini bus, Mosis dilomun be tan visal moletin xil e bit mesen selxatien e rae xil na Hi mi xil. E melele xa lalonge mak, xil vus labiteni labit, “Xamem mupol vuol ni holesok xil xa Iahova tehiteni.” 4 Ma Mosis midis xat rae xil vus ak na Hi di e Vanuvei te Hitxatien te Xeih. E makoe roroh, xi mileh hat xil e pol ni hor te sanien tei pe Vathu Senae. Di, mikili ni hat lu e le tei (12) xa tellep lasomal tengan lihe simeleleen xil te hitxatien te xeih xa vatimol xil na mol-Isrel xil xa labe lu e le tei (12) lipol ni itel Iahova. 5 Di, Mosis misil rut horam makoe xil laba tengan lihas vongoro xil. Ma ba ladin lelen xil e hor te sanien ba mi Iahova. Di, laleh rut vongoro xil mun e lapol ni be sanien xil te vitueien. ^{▼▼24:5 Sanien xa ladin lelen ni nggoni ngan xa be a Hi kestang. E sanien te vitueien, ladin ni e hor te sanien. Di, rute xa ladin lelen ni be a Hi. E rute, laseti ba ni pris xil ba be ae. E rute, lasa rilomun ni ba be a ngan xil xa lasa ni. E melele xa di langga vituei ni, ngan ak nggoni ngan xa di langganien vituei del Hi.} 6 Mosis miserep kuh re vongoro xil ak be pesin xil, e rute, buil ni ba xat hor te sanien. 7 Di, nggur Vanuvei te Hitxatien te Xeih xa rae xil na Hi di en, e di buli pe met moletin xil tengan lalonge. Melele xa buli bus, moletin xil labiteni labit, “Rae xil vus ak, xamem mulong xati, e muhusil xat Iahova vehakut.”

8 Melele xa labiteni mak, Mosis mileh ra xa di pesin xil e buil ni ba xat moletin xil e biteni bit, “Ra ak di misa xeihen mi hitxatien te xeih xa Iahova pol ni del xamim e melele xa mubit sepinien xil ak.” ^b

12 Di, Iahova biteni mi Mosis bit, “Umei visal nou e vathu ak e usotil nou en. Inou nisa hat lu (2) minuk xa nadis xat rae xil en tengan ihe selxatien mi moletin xil.” 13 Ma Mosis nggur moletin tei tengan itutou ni, hisen Sosua. Xalu lusak xat xalu tengan lalihe nesao e vathu na Hi. 14 Mosis biteni mi vat xil bit, “Xamim muti tak ituxoh melele xa maltilomun e Eron xal Hur laliti tak itel xamim. E xosxa moletin tei bit vamal ni ngongoren tei nan, ma mikila mei ipus xalu.”

15 Di, Mosis xalu lupungei lube nesao e Vathu Senae e momah mei da xole. 16 Miehen na Iahova bemei e tan e vathu ak, xa minahin pupu e moletin xil xa ladi tan lapusi nggoni upang tei xa di nggan e romulit vathu ak. Momah da xol vathu ak melengien tei e he sav (6). E melengien lu e he sav (7) nen, rae na Hi mistal nggo momah e mikes Mosis tengan vahe nesao visali. 18 Ma Mosis be vangit momah ak e ba pilei sung nesao visali e romulit vathu. Melengien xil vus xa Mosis tete vathu ak tetuxoh hanutap lu (40).